Ireme ry’uburezi mu Rwanda: Ingaruka mbi ku bukungu bw’igihe kirekire n’umuti wavugutwa

Ubushakashatsi butandukanye bwerekana ko nta gikozwe, uburyo ireme ry’uburezi mu Rwanda rihagaze byazagira ingaruka mbi zidasanzwe ku bukungu bw’igihugu mu gihe kizaza, hanashingiwe ku mpungenge zigaragazwa n’abakoresha, ku bakozi bava mu mashuri cyane cyane ayo mu Rwanda badafite ubushobozi bukenewe.

Hanagaragara ingero z’aho bamwe barangiza kaminuza mu myaka itatu cyangwa ine, ugasanga batabasha guhatanira akazi ndetse bamwe badashobora no kwiyandikira igitaho gisoza amashuri ya kaminuza, bagakora ibyo bita ‘kudodesha’.

Burya ngo ukomye urusyo akoma n’ingasire; iyo witegereje usanga ikibazo cy’ireme ry’uburezi mu Rwanda gihera mu mashuri abanza.

Umuryango mpuzamahanga wita ku bana, Save the Children, mu 2011 wasohoye icyegeranyo gishimangira uburyo ireme ry’uburezi ricumbagira cyane cyane mu mashuri abanza.

Ubwo bushakashatsi bwagaragaje ko abanyeshuri biga mu mwaka wa kane kugeza mu wa gatandatu w’amashuri abanza bagira ingorane mu gusoma no kumva ibyo basomye mu myandiko y’Icyongereza n’Ikinyarwanda iba mu bitabo byo mu mwaka wa Kabiri n’uwa Gatatu.

Bwanagaragaje ko na nyuma y’imyaka itatu y’amashuri abanza, 13% by’abanyeshuri bo mu mwaka wa Kane badashobora gusoma ijambo na rimwe ry’Ikinyarwanda ryanditse mu bitabo by’umwaka wa kabiri n’uwa gatatu. Naho abandi 13% ngo ntibabashoboraga gusoma amagambo arenze 15 mu munota umwe.

Ugucumbagira kw’ireme ry’uburezi mu mashuri makuru na za Kaminuza, bipimirwa ahanini mu bizamini by’akazi cyangwa ibyo kwinjira mu ngaga z’imyuga itandukanye.

Urugero rwa hafi ni aho urugaga rw’abaforomo n’ababyaza mu Rwanda ruherutse gutangaza ko ikizamini ruha abasoje ayo masomo mu mashuri makuru na za kaminuza zo mu Rwanda cy’abashaka kurwinjiramo, icya kabiri cy’abagikoze ari bo bagitsinda.

Si aho gusa kuko no mu rugaga rw’Abavoka usanga ikizamini baha abashaka kurwinjiramo gitsinda bake kuko mu bantu nka 180 baherutse kugikora, abagera kuri 80 aribo bemerewe gukora icy’ikiganiro (interview).

Abakoresha barumiwe…

Kuba iryo reme riri hasi binagaragara cyane nk’iyo mu kigo runaka hatanzwe ikizamini cy’akazi, akenshi abagikosoye cyangwa se abakoresheje ikizamini cy’ikiganiro bikunze kurangira bifashe ku munwa kubera ubumenyi bucumbagira bwa benshi mu baba bifuza akazi.

Ubwo bumenyi bukemangwa ni ubwerekeranye n’indimi, ku byiciro byose by’abasoza amashuri, yaba abanza, ayisumbuye, amakuru na za kaminuza.

No ku birebana n’ubumenyi mu bya siyansi, ikoranabuhanga, ubumenyi ngiro, ubukungu, icungamutungo n’ibindi, bivugwa ko ababyize barangizanya ubumenyi bucagase butababashisha gukora akazi uko bikwiye.

Ikibabaje kurusha byose ni uko mbere ikibazo cyahoze ari ubuke bw’amashuri abanza, ay’isumbuye na za kaminuza none yabaye menshi. Igisigaye ni ikirebana n’ireme ry’uburezi, abarangiza kwiga bagasohoka batyaye mu mutwe.

Politiki y’uburezi yakunze kurangwa n’ihindagurika mu myaka 22 ishize. Habayemo guca Igifaransa himikwa Icyongereza kandi abarimu benshi ari cyo bari barizemo kugeza no muri kaminuza zikomeye nka Louvain n’izindi.

Hashyizwe imbaraga mu gutoza abarimu Icyongereza batari bamenyereye, bamwe birabagora kugeza n’ubu.

U Rwanda ntirugira peteroli, amabuye y’agaciro si menshi cyane yewe n’ingano y’ibicuruzwa birukorerwamo byoherezwa hanze ntihagije, umutungo ukomeye igihugu gifite ni ubumenyi n’imbaraga z’abagituye.

Mu gihe rero nta mutungo kamere rufite ku bwinshi ndetse n’igihugu kikaba kidakora ku nyanja, ubukungu bw’u Rwanda ahanini bukwiye gushingira ku baturage barwo, imbaraga zabo, ubumenyi bifitemo n’ubuhanga.

Ubukungu bw’u Rwanda bukwiye gushingira ahanini kuri serivisi zisaba ubumenyingiro n’ikoranabuhanga, zanazamuye ibihugu bitandukanye nka Amerika, u Bushinwa, Singapore, Korea y’Epfo, u Buyapani n’ibindi.

Ibi birasaba abaturage bize kandi b’abahanga mu byo bakora, kandi ni na yo ntego igihugu cyihaye.

Mu gihe rero ireme ry’uburezi rigumye aho riri, nta kabuza bizagorana kugira ngo igihugu kigere ku ntego mu gihe benshi mu bakiri bato bari cyangwa basoje amashuri bajya ku isoko ry’umurimo badafite bwa bumenyi buhagije.

Ibisubizo biri muri bene igihugu

Ikibazo cy’ireme ry’uburezi mu Rwanda ni urusobe rw’ibintu byinshi birimo no kuba abarezi baba abo mu mashuri abanza, ayisumbuye, amakuru na kaminuza barimo abatari ku rwego rufatika rwababashisha gutanga ubumenyi bukwiye ku banyeshuri, bikaba bisaba ko bafashwa gutyaza ubwenge bakaba kugira ngo babigereho.

Kubigeraho si ngombwa ko hazanwa abarimu bavuye imahanga aho uburezi bwateye imbere kurusha mu Rwanda, birasaba ko abitangira uyu murimo b’abenegihugu bafashwa kuwukora mu buryo bunoze.

Kugarura uburyo bw’imyigire buzwi nka Gong unique, abanyeshuri bakajya biga kugera saa munani z’amanywa, bishobora gufasha. Igihe gisigaye kigaharirwa abarimu bakaruhuka isaha imwe, ubundi guhera saa cyenda bakagaruka bagahugurwa amasaha abiri ya buri munsi, cyangwa se nka kane mu cyumweru.

Byanajyana n’uko muri buri karere hashyirwamo ibigo nka bitatu cyangwa bine bizajya byigishirizwamo abarimu, hakagenda hahuzwa abigisha amasomo amwe, urugero nk’abigisha imibare bagahugurwa ukwabo.

Hakoreshwa kubacamo amatsinda mato y’abantu hagati ya 7 na 10 bahujwe n’imikoro, ibiganiro mpaka n’ibindi. Iyi gahunda yatanga umusaruro ufatika bitarenze imyaka 3 iramutse ishyizwe mu bikorwa, kuko kuzamura ubumenyi mu barimu byagira ingaruka nziza ku bumenyi baha abanyeshuri.

Niba abasirikare n’abapolisi bahora boherezwa mu mahugurwa, abayobozi mu nzego zitandukanye bikaba uko, kuki bitakorwa no ku barimu?

Umusanzu w’abahabwa Buruse muri gahunda ya Perezida

Ikindi gisubizo kuri iki kibazo, ni ugufata abahabwa buruse muri gahunda ya perezida bajya kwiga mu mahanga, badakunze kugaruka, bakaza gutanga umusanzu wabo.

Byaba byiza hashyizweho gahunda y’uko nibura bajya babanza bagakorera Leta imyaka ibiri nyuma yo gusoza amasomo, mbere y’uko bemererwa kujya gukora ibindi bifuza. Aba byanze bikunze bagiye bagaruka bakigisha muri icyo gihe byatanga umusaruro, dore ko baba bazanye bwa bumenyi usanga abenshi mu Rwanda bakurikira hanze.

Abanyapolitiki bazi iki kibazo?

Abifite usanga abana babo biga mu mashuri yo mu Rwanda cyangwa mu mahanga, ariko amwe y’indobanure adakemangwa ubushobozi.

Makuba Aoron, Umunyarwanda wabaye Umudepite ndetse n’Umunyamabanga wa Leta muri Minisiteri y’Ubuhinzi n’ubworozi, aherutse kugaragaza uburyo ireme ry’uburezi rigihura n’ibibazo bikomeye n’uko ryazahurwa.

Yagize ati “Uburezi ni inkingi ikomeye cyane, kuko iyo ushaka guhindura imbuto z’igiti ugomba kujya mu mizi, niba dushaka kwihutisha iterambere ry’iki gihugu tujye mu mizi, mu mizi ni mu burezi, mureke tuhashyire ingufu nyinshi cyane ….”

Muri iyo nama yahuje abagize inteko rusange y’Umuryango FPR Inkotanyi mu karere ka Kicukiro, yakomoje ku babona iryo reme risubira inyuma bakanyonyomba.

Ati “Nagira ngo tuvuge ku kibazo cyerekeranye n’ireme ry’uburezi, iki kintu bakunze kukivugaho, tubwizanye ukuri, muri iki gihugu abantu benshi bishoboye bohereza abana babo kwiga hanze. No muri iki cyumba mberabyombi (salle) wasanga kimwe cya kabiri, abana babo biga kaminuza hanze, Uganda, Kenya mu Burayi, Amerika n’ahandi.”

Ati “Impamvu ni uko bashaka ahari ireme ry’uburezi kurushaho, kugira ngo abana babo nibaza bazabone akazi keza.”

Kimwe mu byakemura icyo kibazo ngo ni uko nibura muri buri Ntara hashyirwaho ishuri ry’icyitegererezo (Schools of excellence), ajyanwamo abana bafite ubuhanga kurusha abandi, kuko ngo hari abatsindira kuri ayo manota ariko bakajya kwiga mu mashuriy’uburezi bw’imyaka 9 na 12 kubera amikoro make atabemerera kujya kure.

LEAVE A REPLY

Please enter your comment!
Please enter your name here