Rulindo: Polisi yagiriye inama abanyeshuri bagiye mu biruhuko

Rulindo

Polisi y’u Rwanda ikorera mu karere ka Rulindo yagiriye inama abanyeshuri barenga 800 kuzitwara neza mu biruhuko bagiyemo birinda ibiyobyabwenge, n’ibindi byaha bikururwa nabyo, banasabwa kandi kuzakangurira urundi rubyiruko n’abaturanyi kwirinda ibiyobyabwenge n’ibindi byaha.

Rulindo

Abo banyeshuri bahawe ibiganiro ni abo mu rwunge rw’amashuri rwa Burega(GS Burega) bagera kuri  289, abo muri G.S Kinihira ,  426 n’abo  muri  G.S Buyoga bangana na 162 ,ibi bigo byose biherereye mu mirenge ya Buyoga, Kinihira na Ntarabana.

Bakaba baraganirijwe mu bihe bitandukanye  tariki  14 Ugushyingo, bihereye mu mirenge ya Buyoga, Kinihira na Ntarabana.

Mu biganiro yahaye aba banyeshuri Assistant Inspector of Police (AIP) Sam Ngororano ushinzwe guhuza ibikorwa bya Polisi n’abaturage mu karere ka Rulindo, yabasobanuriye amoko y’ibiyobyabwenge  birimo kanyanga, urumogi, n’izindi nzoga zitemewe mu Rwanda.

AIP Ngororano yabwiye aba banyeshuri ko mu biruhuko bagiyemo bakwiye kubyirinda bakagaragaza ikinyabupfura n’uburere bakuye ku ishuri.Yabasobanuriye ko nibakoresha ibiyobyabwenge bizabagiraho ingaruka zitandukanye kuko bizabakoresha ibyaha.

Yagize ati:” Ibiyobyabwenge nibyo bikurura ubusinzi, ubujura,gukubita no gukomeretsa, gufata ku ngufu, ihohotera , amakimbirane mu miryango ndetse n’ubusambanyi”.

AIP Ngororano yabwiye abakobwa ko bazirinda abantu bazaza babashukisha impano zitandukanye zigamije kubashora mu busambanyi kuko akenshi ari naho haturuka inda z’imburagihe.

Yabwiye aba banyeshuri ko ikiruhuko bagiyemo bazakibyaza umusaruro basubiramo mu  masomo ya bo, bafasha ababyeyi imirimo, bakajya banitabira inteko  z’abaturage n’amatsinda atandukanye(clubs) bagatanga ibitekerezo byo gukumira ibyaha.

Umuyobozi w’ishuri rya G.S Burega, Rwagasana Ephrem yashimiye Polisi uburyo idahwema kugira inama ibigo by’amashuri cyane cyane gukumira ibyaha no kurwanya ibiyobyabwenge.

Abanyeshuri bahawe umwanya bashima  impanuro n’inama bahawe na Polisi bavuga ko batazishora mu biyobyabwenge kuko byabadindiriza imyigire bikanangiza ubuzima bwa bo bw’ejo hazaza.

Aba banyeshuri basezeranyije kuzajya batanga amakuru ku nzego z’umutekano cyangwa ku bayobozi babegereye igihe cyose babonye umuntu ari mu byaha.

Nsabimana Francois

LEAVE A REPLY

Please enter your comment!
Please enter your name here