Minisiteri y’Uburezi yahagaritse amashami abiri yigisha ibijyanye n’ubuvuzi muri Kaminuza ya Gitwe

Minisiteri y’Uburezi yafashe umwanzuro wo guhagarika amashami abiri afitanye isano n’Ubuvuzi y’Ishuri Rikuru ry’Uburezi rya Gitwe (ISPG), nyuma y’aho rinaniriwe kuzuza ibisabwa ngo amasomo atangwa abe akurikije amabwiriza.

Amashami yahagaritswe ni iryigisha ibijyanye na Laboratwari n’Ubuvuzi n’iryigisha Ubuvuzi no kubaga.

Ni umwanzuro ufashwe nyuma y’iminsi mu itangazamakuru havugwa ikibazo Inama Nkuru y’Amashuri Makuru (HEC) ifitanye n’Ishuri Rikuru ry’Uburezi rya Gitwe (ISPG), aho ryasabwe kutakira abanyeshuri b’umwaka wa mbere bo mu ishami ry’ubuvuzi mu gihe cy’imyaka ibiri, ni ukuvuga guhera muri Nzeri 2017 kugera muri Nzeri 2019.

Ubusanzwe ISPG itanga amasomo mu mashami atanu arimo iry’Uburezi, Ikoranabuhanga, Ubuforomo, ibijyanye na Laboratwari n’Ubuvuzi. Muri rusange 85% by’amasomo atangwa muri ISPG ni ajyanye n’ubuvuzi.

Isuzuma ryakorewe iyi Kaminuza ngo ryerekanye ko idakurikirana abanyeshuri ngo bimenyereze umwuga w’ubuvuzi uko bikwiye, ko yakira abanyeshuri batujuje ibisabwa ndetse ko ifite abarimu badahagije.

Mu kiganiro n’Abanyamakuru cyabaye kuri uyu wa Kabiri tariki ya 29 Mutarama 2019 nyuma y’ibiganiro Minisiteri y’Uburezi yagiranye n’Ubuyobozi bw’iri shuri, ni bwo hatangajwe umwanzuro wo guhagarika ayo mashami abiri.

Minisitiri w’Uburezi, Dr Mutimura Eugène, yavuze ko ibiganiro bagiranye n’Ubuyobozi bwa Kaminuza ya Gitwe byarangiye batarumva ko kwigisha nabi abaganga bifite ingaruka mbi ku gihugu.

Ubusanzwe amabwiriza avuga ko umwarimu umwe yigisha abanyeshuri 25 mu gihe i Gitwe umwarimu yigisha nibura abanyeshuri 86.
Minisitiri w’Uburezi yavuze ko mu nama bagiranye n’Ubuyobozi bwa Kaminuza ya Gitwe, Umuyobozi Mukuru wungirije wayo yavuze ko u Rwanda atari Amerika, ko rucyiyubaka ku buryo rutagera ku bintu byose ako kanya.

Minisitiri Mutimura yagize ati “Birababaje cyane kubona Umuyobozi wungirije muri iyi nama atubwira ngo ntabwo ari ngombwa kugira ngo tugire umubare w’abarimu uhagije, ntabwo ari ngombwa kwigisha inyigisho z’ubumenyi ngiro kubera ko u Rwanda atari Amerika, cyangwa igihugu gikwiriye kugendera ku buziranenge dushaka.”

“Duhisemo kuziharigarika kugeza igihe bazasabira uburenganzira bwa mbere kuko ntibumva ko kwigisha nabi bishobora kugira ingaruka mbi ku buzima bw’abanyarwanda.”

Kuba Dr Muvunyi Emmanuel uyobora HEC yarashyizwe mu majwi ko ari we utuma iyo Kaminuza ifungirwa, Mineduc yabihakanye ivuga ko ntacyo yakoze ku giti cye cyangwa ngo agikore wenyine Minisiteri itabizi.

Minisitiri Mutimura yavuze ko barafasha abanyeshuri bo mu mashami yafunzwe gukomeza amasomo yabo ahandi.

Mu igenzura ryakozwe na HEC mu 2017, yasanze ibimenyetso bigaragaza ko ISPG yakiriye abanyeshuri 43 mu Ishami ry’Ubuvuzi batarize amasomo yo mashuri yisumbuye asabwa kwiga ubuvuzi, arimo Ibinyabuzima (Biologie) n’Ubutabire (Chimie).

Aho kubavutsa igihe bari bamaze biga, HEC yasabye ko bafashwa ku buryo bagira ubumenyi bw’amasomo batize ariko nabyo ntibyakorwa.

Mu ntangiriro z’uyu mwaka kandi abanyeshuri 34 biga ibijyanye na laboratwari bagombaga gusoza amasomo muri iyi kaminuza, byabaye ngombwa ko batemererwa nyuma yo gutahura ko hari abahimbye impapuro zemeza ko bimenyereje umwuga muri CHUK.

Abakozi ba CHUK bandikiye Inama Nkuru y’Amashuri Makuru, HEC, bemeza ko imikono yabo yahimbwe n’abanyeshuri bakavuga ko aribo babakurikiranye mu kwimenyereza umwuga.

Uhagarariye Kaminuza ya Gitwe mu mategeko akaba n’umwe mu banyamigabane, Urayeneza Gérard yavuze ko batunguwe n’umwanzuro bafatiwe.

Yavuze ko nabo batemeranya n’ibyo Umuyobozi wungirije yavuze ko u Rwanda atari Amerika ariko ngo nta mwanya bahawe wo kubisobanura.

Ku kuba ibyo basabwe gukosora batarabikoze, Urayeneza yabihakanye avuga ko ari ‘urwitwazo’.

Ati “Ni urwitwazo kuko biratangaje kubona basura laboratwari zacu bagatangaza ko ari zo za mbere mu Rwanda, none se mu mezi angahe zaba zarasenyutse zitagihari? Ikibazo cy’abanyeshuri abayobozi ba kaminuza batakurikiranye, ibyo ntituzi aho bishingiye. Bose uko ari 34 bakoze stage zabo kandi barashimwa, barindwi bavuga ko bahimbye imikono batubwiye ko bababeshyeye.”

Kugira ngo amashami yafunzwe azakomorerwe, Mineduc yatangaje ko ishuri rizongera kwandika risaba kuyatangiza bundi bushya, ryakuzuza ibisabwa rikemererwa.

LEAVE A REPLY

Please enter your comment!
Please enter your name here